Saytning eski versiyasi !

An’anaviy Open Data Challenge 2016 tanlovi e’lon qilindi

01 November 2016 Chop etish

Toshkent shahrida Open Data Challenge 2016 – ochiq ma’lumotlar asosida ilovalar yaratish bo‘yicha an’anaviy tanlovning e’lon qilinishi munosabati bilan matbuot anjumani tashkil etildi.

Tanlov Axborot texnologiyalari va kommunikatsiyalarini rivojlantirish vazirligi, BMT "Taraqqiyot dasturi"ning O‘zbekistondagi vakolatxonasi hamda Toshkent shahridagi Inha universiteti hamkorligida o‘tkazib kelinadi.

Open Data Challenge — dasturchi, dizayner hamda jurnalistlardan tashkil topgan IT-jamoalarning davlat ochiq ma’lumotlaridan foydalangan holda ishlab chiqqan dasturiy mahsulotlari, loyihalarini saralab oluvchi tanlov. Open Data Challenge tanlovining o‘ziga xosligi shundaki, hali g‘oya sifatida taqdim qilingan loyihalar jamoalar tomonidan 2 sutka ichida yangi veb-, mobil ishlanma, interaktiv xizmatning namunaviy yoki birlamchi nusxasiga aylantirilishi, shuningdek g‘oyani amalga tatbiq etishga xizmat qiladigan va uni aniqroq ifodalashga yordam beradigan infografika, maqolalar tayyorlanishi lozim.

Ushbu muhlat orasida Open Data Challenge 2016 ishtirokchilarining sa’y-harakatlari bilan aholi uchun turmush tarzining turli jabhalari, jumladan, iqtisodiyot, transport, ta’lim, sog‘liqni saqlash, ekologiya kabi yo‘nalishlarda foydali yangi ijtimoiy loyihalar dunyoga keladi.

Qolaversa, Open Data Challenge 2016 doirasida jurnalist hamda dasturchilar uchun ochiq ma’lumotlar bilan ishlash, ulardan foydalanishga bag‘ishlangan mashg‘ulot va o‘quvlar bo‘lib o‘tadi.

Tanlovda dasturchilar, grafik-tasvir dizaynerlari, internet sohasi vakillari, tahlilchilar, jurnalistlar, faollar va ochiq ma’lumotlar bilan ishlashga qiziqqan barcha ishtirok etishi mumkin.

Tanlovda asosiy shart — yaratilajak mahsulot, ya’ni ilova, xizmat, infografika hamda ma’lumot Open Data Challenge 2016 mobaynida yaratilgan va ungacha tayyorlanmagan bo‘lishi kerak. Shuningdek, tanlov davomida mavjud ishlanmalarni, manbaalarni yanada rivojlantirib, boyitgan holda ham ishtirok etish mumkin.

Open Data Challenge 2016'da ishtirok etish bepul va xohlovchilar buning uchun ro‘yxatdan o‘tishlari zarur. Tashkilotchilar tomonidan barcha ishtirokchilar oziq-ovqat, internet hamda qulay ishlash muhiti bilan ta’minalanadi.

Tanlovda barcha loyihalar 27 noyabr kuni davlat idoralari va jamoatchilik, biznes vakillari, mustaqil ekspertlardan iborat tanlov hakamlar hay’ati e’tiboriga taqdim etiladi.

G‘oliblar quyidagi nominatsiyalar bo‘yicha aniqlanadi:

Ochiq ma’lumotlar asosida yaratilgan eng yaxshi ijtimoiy loyiha (mobil va veb-ilova);

Ochiq ma’lumotlar asosida yaratilgan eng yaxshi biznes loyiha (mobil va veb-ilova);

Ochiq ma’lumotlar asosida yaratilgan eng yaxshi ijodiy ish (infografika va maqola).

Batafsil ma’lumot va aloqa https://data.gov.uz manzilida.

Press-relizni yuklab olish (Word 25 Kb).

Muallif: Axborot xizmati

Davra
Fuqarolar murojaati Statistika Qayta aloqa Ishonch telefoni